‘Zwe Tradisyonnel Sesel ‘Plis ki Lwazir’ i en legzibisyon ki ekplor larises Zwe Tradisyonnel Seselwa. Zwe Tradisyonnel i form parti bann leritaz kiltirel entanzib ki Seselwa in erite avek bann zanset sorti Lerop, Lafrik avek Lazi.  I annan anviron 82 zwe tradisyonnel ki Konsey Nasyonal pour Sport in dokimante. Entegrasyon sa bann zwe dan kiltir Kreol in fer ki laplipar sa bann zwe in pas dan en faz readaptasyon, parey bann zwe lo bord, bann sanson ronn, ensi ki bann zouzou ki ti ganny fabrike lokalman.

Menm si zwe tradisyonnel i ganny assoye avek zanfan e zenn, dimoun avek diferan personalite ti parstisipe e apresye sa bann zwe konman en form lwazir ki ti ede pour detann e gard zot an bonn sante. Zwe ti tre popiler dan bann vwazinaz, dan bann lekol, lo bor lanmer osi byen ki dan bann levenman kiltirel, sportif, ek relizyez.

I annan serten zwe tradisyonnel ki ankor pe ganny pratike regilyerman e i annan bann ki pa tro popiler e lezot ki’n disparet konpletman. Zwe tradisyonnel Seselwa i annan bokou potansyel pour ganny develope e komodifye konman en prodwi touristik pour bann viziter apresye. I osi kapab ede dan lepanouisman bann zanfan dan sport, ledikasyon e lar.  Menm si Zwe Tradisyonnel in perdi son plas dan sosyete konman enn bann form lwazir prensipal, i annan bokou ki kapab ganny fer pour relev e readapte sa bann pratik konman bann aktivite modern dan diferan sekter tel ki kiltir, sport, ledikasyon, lartizana, e tourizm.